Қытайдың Хэнань провинциясында су тасып, мыңдаған адам көшірілді

Қытайдың орталығындағы Хэнань провинциясында төпелеп жауған жаңбыр соңы алапат тасқынға ұласып, ауылдардың 4100-ден астам тұрғынын эвакуациялауға тура келді. Топан судан жолдар өзенге айналып, электр және байланыс жүйесі істен шыққан.

Жалпы алғанда, дауыл мен тасқыннан 15 елді мекенде 300 мыңға жуық адам зардап шегіп, біреуі қаза тапқан және екеуі жоғалып кетті.

Жергілікті басшылық қауіпке душар болғандарды әкімшілік орталықтарына, мектептерге және қонақ үйлерге орналастырды. Ал, электрик-мамандар ауылдарға аттанып, зақымданған энергия жүйесін қалпына келтіріп жатыр.