Степногорск қаласында 58 саяжай учаскесі өртеніп кетті

Ақмола облысының Степногорск қаласында саяжай аумағында өрт болды. Қурап тұрған құрғақ шөп отқа оранған. Қызыл жалын лезде үйлерге қарай ойысқан. Әріптесім Ермек Елберген байланысқа шығып, мән-жайды баяндамақ. 

Ермек Елберген, тілші: 

Зардап шеккендер жоқ. Алдымен 20 гектар аумақта қурап тұрған шөп жанған. Кейін қызыл жалын саяжай аумағына ойысқан. От көзді ашып - жұмғанша 3 жарым гектар аумақты шарпып үлгерген. Салдарынан 58 саяжай учаскесі түк қалмай жанып кетті. Арасында 3 үй де бар. Көбі қараусыз тұрған екен. Құрал-сайман сақтайтын кішігірім қора-қопсы да күлге айналды. Кеше кешкі сағат 5 кезінде басталған өрт 9-дарда ауыздықталып, онда толықтай сөндірілді. Тілсіз жаумен күреске 50 шақты адам, 10 техника жұмылдырылды. Қазір өрттің шығу себебі мен шығын көлемі анықталуда. 

Ермек Елберген