Жаңалықтарды Telegram арнамыздан оқыңыз!Қуаңшылықтан зардап шеккен Маңғыстау облысына қосымша 5,3 миллиард теңге бөлінуі мүмкін. Бұл туралы Ауыл шаруашылығы министрінің міндетін атқарушы Ербол Қарашөкеев айтты. Жем-шөп бағасын төмендету мақсатында бұған дейін Маңғыстау мен Қызылордаға үкімет резервінен 3,6 млрд теңге бөлінген. Ол ақша Маңғыстаулық шаруаларға беріліп жатыр. Ал, Қызылордада 20-шы тамызда басталады.
Сондай-ақ, жем-шөп дайындауға жергілікті бюджеттерден 9,1 млрд теңге бөлінген. Одан бөлек, «Азық-түлік келісім шарт корпорациясы» тарапынан нарық құнынан 17 пайызға төмен бағамен 1,7 мың тонна арпа сатылған. «Қазақстан темір жолы» жем-шөп тасымалдауға арналған тарифті 77 пайызға төмендетті. Бұл баға тамыздың аяғына дейін сақталмақ. Табиғи резервтер мен қорықтардағы 211 гектар жерден жем-шөп алуға рұқсат берілген. Шаруаларға көмек көрсету үшін арнайы шот ашылып, оған ауыл шаруашылығы министрлігінің өкілдері бір күндік еңбекақысын аудармақ.
Амангелді Сейітхан
