Жаңалықтарды Telegram арнамыздан оқыңыз!IV тоқсанда «жасыл» және «сары» аймақтағы мектеп оқушыларына маска тақпай-ақ, дәстүрлі форматта оқуға рұқсат берілді. 1 сыныптағы бала саны 25-тен аспауы тиіс. Ал қызыл аймақтағы өңірлерде жалпы білім беретін мектептердің 5-сыныпқа дейінгі, халықаралық мектептердің 7-сыныпқа дейінгі оқушылары аралас оқыту форматында, маска тағу режимін қатаң сақтай отырып, білім алады. Бұл туралы Білім және ғылым вице-министрі Шолпан Каринова мәлімдеді. Мектептерде музыка, көркем еңбек, информатика сынды қосымша пәндер қашықтықтан оқытылады. Бірақ дене шынықтыру пәнін таза ауада өткізу қарастырылған. Оқушылардың ыңғайлы форма киюіне де еркіндік беріледі. Тәуекелі төмен және орташа аймақтарда асханалар өз жұмысын бастайды. Мектеп-интернаттар дәстүрлі оқыту форматына оралады. Оқу үлгерімі төмендеген балалармен жеке жұмыс істеу жалғасады.
Шолпан Каринова, ҚР Білім және ғылым вице-министрі:
Нұр-Сұлтан қаласы «қызыл» аймақта, сондықтан қазіргі қабылданған шешім бас қалаға таратылмайды. Әр мектепте санитарлық талаптарды сақтау бойынша тиісті жұмыстар атқарылып жатыр. 1 сәуірге дейін, яғни демалыс кезінде білім басқармасы тиісті шараларды қабылдап жатыр.
1-сынып оқушыларын мектепке қабылдауға құжат тапсыру 1 сәуірден басталады. Құжатты «электронды үкімет» веб порталы арқылы онлайн тапсыруға болады. Ата-ананың өтінішін, баланың туу туралы куәлігі мен 2 фотосуретін және денсаулық паспортын ғана өткізу жеткілікті. Білім беру ұйымдарының өзге құжаттарды сұратуға құқығы жоқ.
