Елімізде төтенше жағдай режимі аяқталды. Десе де індет өршіп тұрған өңірлерде карантин жалғаса береді. Бүгін мемлекеттік комиссияның қорытынды жиынын өткізген Президент Қасым-Жомарт Тоқаев шектеулер әр өңірдегі жағдайдың жақсаруына қарай біртіндеп алынатынын айтты. Сондай-ақ, елімізді әлеуметтік-экономикалық дамыту бойынша жеті бағытты да айқындап берді.
Яғни блок-бекеттер бірден алына салмайды. Барлығы коронавирустың таралуына байланысты. Азайған сайын, шектеулер алына береді. Соған қарамастан көптеген саланың қызметі қалпына келе бастады. Қазірдің өзінде 1 миллионнан астам азамат жұмысқа шыққанын айтты Президент. Ендігі міндет - дағдарыстан шығу. Сондықтан Төтенше жағдай жөніндегі комиссия бұдан былай Экономикалық өсімді қалпына келтіру жөніндегі комиссия болып қайта құрылмақ. Өйткені коронавирус әлемдік экономикаға ауыр соққы болды. Тіпті жер-жаһанда 400 миллионнан астам кәсіпорын бонкрот болудың алдында тұр. Еліміз бұған жол бермей, керісінше бизнесті қолдауы керек.
Жұртты қол жетімді баспанамен қамтуға да ерекше мән беріледі. Президент осы бағытта «7-20-25» секілді «5-10-20» деп аталатын жаңа тұрғын үй бағдарламасын құруды тапсырды. Оның шарттары әлдеқайда тиімді болмақ.
Сөз соңында Қасым-Жомарт Тоқаев Мақтаарал ауданында су тасқынынан зардап шеккендердің мәселесіне де тоқталды. Айтуынша, күзге дейін қираған үйлердің орнына жаңасы салынады.
Досжан МАРАТҰЛЫ
![](https://px.mediadata.kz/s.gif?mh_id=7916e9245b3c5232be2c21bfdafded87&mh_news=Елімізде төтенше жағдай режимі аяқталды&mh_tags=Qazaqstan&mh_page=https://qazaqstan.tv/news/126590/)