Жаңалықтарды Telegram арнамыздан оқыңыз!Ақтауда 70 шақты тұрғын құрылыс компаниясына қаражат салып, сан соғып қалды.
Олар «Grand Avenue-2» тұрғын үй кешенінен баспана алу үшін әрқайсысы 20-45 миллион теңге аралығында ақша төлеген. Құрылыс жұмыстары 2021 жылы басталғанымен, кешеуілдеп, былтыр мүлде тоқтап қалған. Ал келісімшарт бойынша үлескерлер биыл қоныстануы тиіс. Құрылыстың аяқталатынынан мүлдем күдер үзген тұрғындар қаражаттарын қайтаруды талап етуде.
Ринат Қайыржан, Жаңаөзен қаласының тұрғыны:
Келісімшарттың уақыты болайын деп жатыр. Осы 2025-тің май айында бітуі керек. Енді ақша да, үй де жоқ. Құрылыста ешқандай қозғалыс жоқ. Сот шешім шығарды. Соттан жеңдік. Соттан жеңгенмен, ешқандай нәтиже жоқ. Өндіре алмай отырмыз ақшамызды.
Әкімдіктегілердің мәліметінше, құрылыс компаниясы тұрғын үй құрылысын заңсыз бастаған. Бүгінде нысанды бұзу жөнінде сот шешімі шыққан.
Алғадай Қоштаев, Маңғыстау облыстық мемлекеттік сәулет-құрылыс басшысының орынбасары:
Біз әкімшілік жауапкершілікке тарттық. Нұсқамасын бердік. Ешқандай құжатсыз, жұмыс жобасыз, экспертизасыз күйінде салғаны үшін әкімшілік жауапкершіліктен кейін сотқа бердік. Соттың шешімі бұзуға шықты.
Ал құрылыс компаниясының өкілі Олжас Мұратовтың сөзінше, құзырлы органмен медиативтік келісім жасалып, құрылыс жұмыстарын қайта жалғастыруға шешім қабылданған. Жоба шамамен келесі жылдың бірінші тоқсанында тапсырылмақ.
Аягөз Оралбайқызы
