Жаңалықтарды Telegram арнамыздан оқыңыз!Қызылордада балаларға арналған Президент шыршасы өтті. Жаңа жылдық мерекелік шараға облыстың әрі ауданынан 200-ден аса оқушы қатысып, шат-шадыман қуанышқа бөленді.
Сыр өңірінің өрендері жаңа жылдық думанда ертегілер әлеміне саяхаттап, театрландырылған көріністі тамашалады. Бірінен-бірі өткен өнерлі балалар ән айтып, би билеп, түрлі ойын-сауық шараларға белсене қатысты. Президент шыршасында Мемлекет басшысының сыйлығына ие болған оқушылар мерекені сезініп, риясыз көңіл-күйге бөленді.
Ахметжан Жәнібекұлы, оқушы:
Мен Қармақшы ауданынан келдім. Бұл Президент шыршасы маған өте қатты ұнап жатыр. Менің сабақтан да спорттан да жетістіктерім өте көп. Болашақта әлем чемпионы болғым келеді.
Делару Ибраева, оқушы:
Осы шырша маған өте ұнады. Оның ішінде маған түлкі, қасқыр және де эльфтер ұнады. Мен өте көңілдімін.
Жалпы аймақ оқушылары үшін ұлу жылы жемісті жыл болды. Сырбойылық өрендер пәндік олимпиаларда топ жарып, халықаралық білім байқауларында да үздік атанғандар бар. Жыл қорытындысы сараланған мерекелік шараға оқуда озат, спортта дараланған оқушылар марапат төрінен көрінді.
Асқарбек Есжанов, облыстық білім басқармасының басшысы:
Ауыл олимпиадасында Қызылорда облысынан барған команда жартылыстану-математика бағытында бірінші орынды иеленіп, республикада ең үздік олимпиадалық топ атанды. Бүгін шараға айдынды Арал мен Қарт Қаратаудың аралығындағы аудандардан барлығы 200 бала келіп қатысуда.
Облыста жыл көлемінде 17 білім беру нысаны салынып, 8 мектеп жаңғыртудан өтті. Ал жуырда қалада Оқушылар сарайы пайдалануға беріліп, шығармашыл жастарға жан-жақты дамуына мүмкіндік алды.
Әділбек Серікұлы
