Жаңалықтарды Telegram арнамыздан оқыңыз!Бішкекте қазақ-қырғыз достығын дәріптеген «Қос қанат» жобасының гала-концерті өтті. Аталмыш шара бір жыл бұрын басталған танымал телевизиялық шоудың аралық нәтижесі. Қырғызстандағы концертке қазақстандық 50-ге тарта әртіс қатысты. Олар дәстүрлі ән айтып қана қоймай, эстрадаға дейінгі түрлі музыкалық жанрларды көрсетті. Көрермендер ақындар айтысын, «Жастар» театры мюзиклынан үзінді тамашалады.
Қырғызстан астанасында өткен шараға Астана, Алматы, Тараз сияқты қалалардың өнерпаздары шақырылған. Мақсат – жобаға қатысқан және келесі маусымда бақ сынайтын өнерпаздарды бір сахнада кездестіру.
Аида Смағұлова, К.Әзірбаев атындағы Жамбыл облыстық филармониясының көркемдік жетекшісі:
Бұл жобаның мақсаты – ұлттық өнерімізді ұлықтау, екі елдің достастығын дәріптеу. Жанар Айжанова, Өмірқұл Айниязов, Арман Бексұлтан сынды бір топ қазақ эстрада жұлдыздары өнер көрсетуде. Сонымен қатар, Қырғызстанның халық әртісі Саламат Садықова бастаған қырғыз өнер иелері бүгінгі концертте өнерлерін көрсетіп, қос елдің достастығын бірге халыққа паш етуде.
Қазір бірлескен телекөпір үш мемлекеттік телеарнада көрсетіліп жүр. Ұйымдастырушылардың айтуынша, рейтингі әр шығарылым сайын көтеріліп жатыр. Жалпы «Қос қанат» жобасы барысында екі елдің өнер иелері жанды дауыста ән айтып, ұлттық билерін билейді. Сонымен бірге музыкалық жанрлардың ерекшеліктері, салт-дәстүр мен әдет-ғұрып туралы ой қозғайды.
Нуриза Чинтемирова, «Қос қанат» телекөпірінің продюсері:
«Қос қанат» жобасы Қазақстанның Мәдениет және ақпарат министрлігінің қолдауымен Қазақстанның 2 мемлекеттік және Қырғызстанның басты телеарнасынада көрсетілуде. Бұл ортақ алғашқы жоба болғандықтан жақсы нәтиже көрсеттік деп ойлаймын. Тек мәдениет саласы өкілдерінің ғана емес жалпы көрерменнің де көңілінен шығып жатыр. Жоба әрі қарай да жалғасады.
Гала концерт соңында мемлекеттер арасындағы қарым-қатынасты дамытуға қосқан үлесі үшін Қырғызстанның Мәдениет, ақпарат, спорт және жастар саясаты министрлігінің атынан қазақстандық өнер майталмандары «Құрмет» грамоталарымен және алғыс хаттармен марапатталды. «Қос қанат» тележобасының келесі гала-концерті Қазақстанда өтеді деп жоспарланып отыр.
Асылбек Данияр
