Жаңалықтарды Telegram арнамыздан оқыңыз!
Ашықтық пен демократия - Жаңа Қазақстанның негізгі құндылықтарының бірі. Сенат төрағасы Мәулен Әшімбаев «Amanat» партиясы жанындағы «Талқылау» диалог алаңының отырысында осылай деді. Конституциялық реформа Ата заңға түзетулер енгізумен шектелмейді. Алдағы уақытта Парламент бірқатар жаңа заңдар қабылдап, қолданыстағы кейбір құжаттарға өзгерістер мен толықтырулар енгізеді. Бұл жұмыс жыл соңына дейін жалғасады. Жоғарғы палата спикері жаңғырудың мақсаты – ашық, теңгерімді, демократиялық саяси жүйе және бәсекеге қабілетті, әділ, сыбайлас жемқорлықсыз экономикалық орта құру екенін айтты.
Мәулен Әшімбаев, ҚР Парламенті Сенатының төрағасы:
«Осы референдумға шығарып жатқан Конституциялық өзгерістер, реформалар Жаңа Қазақстанды қалыптастыруға бағытталған қадамдар екенін бәріміз білеміз. Жаңа Қазақстан дегеніміз Президентіміз айтқандай, ең алдымен әділетті Қазақстан. Әділетті Қазақстан дегеніміз – біріншіден заңның үстемдігі, екіншіден барлық азаматтарға бірдей тең мүмкіндіктерді беру дегенді білдіреді».
Асхат Оралов, "Amanat" партиясының атқарушы хатшысы:
"Конституциялық реформа мен жалпыхалықтық референдумды өткізу Қазақстанның әділдік аймағы болады деп әр азаматтың жүрегіне сенім ұялады. Мемлекет басшысына қоғамдық тірек бола алатын біздің партиямыз да барлық өңірлердегі жұмыстарға белсенді қатысуда."
Дарын Сағитов
