Таулы Қарабақтағы қақтығыстар әлі жалғасып жатыр

Бүгін Армения мен Әзірбайжан Таулы Қарабақта қарулы жанжалдың қайта басталғанын жариялады. Осылайша атысты тоқтату туралы режим сақталмай, соғыс 19-шы күнге ұласып отыр. 

Әскери қақтығыс басталғалы Әзірбайжан тарапынан 43 бейбіт тұрғын қаза тауып, 200-ден астамы жараланды. Ал ұлттық армияның қанша адам жоғалтқаны әзірге белгісіз. Таулы Қарабақ күштері жүздеген сарбазынан айырылған.  

Қазанның 14-де Баку Армения Республикасы территориясына алғаш рет соққы бергенін жариялады. Кейбір бақылаушылардың ойынша, бұл мәлімдеме – соғыстың жаңа фазаға көшкенін білдіруі мүмкін. 

Ұрыс барысында тараптар артиллерия мен танкілерді және зеңбіректерді қолданып жатыр. Кейбір мәліметтерге қарағанда, Әзербайжанда бір мектеп шабуылға ұшыраған. 

Халықаралық заң бойынша, Таулы Қарабақ - Әзірбайжанның жері. Алайда, даулы аймақ 1991-1994 жылдардағы соғыс кезінде этникалық армяндардың қолына өткен еді.

Марианна, Таулы Қарабақ тұрғыны:

Біз балаларымыз бен немерелеріміз бейбітшілікте өмір сүрсе екен дейміз. Қазіргідей емес, тыныш заман керек. Бұл – үшінші соғыс. Қорқынышты. Оны соғыс емес, терроризм дегім келеді. Жанжал бітсін деп тілеймін.

Арыстан Рысбек