Елоарданы қардан тазартып үлгермей жатыр

Коммуналдық қызмет елорда көшелерін қардан тазартып үлгермей жатыр. Үй аулаларын былай қойғанда, көлік көп жүретін жолдардың бойында қар үйіліп тұр.

Нұр-Сұлтанда төтенше жағдай жарияланғандықтан, жергілікті билік ұйым-мекемелерді қар тазалау жұмыстарына жұмылдырған. Дегенмен, 1 тәулік өтсе де, қала жолдары мен үй аулалары тазартылмай жатыр.

Жыл басынан бері Елордадан 2 жарым миллион тоннаға жуық қар шығарылған. Күн сайын көше тазалауға 1500 адам мен 1300-ге жуық арнайы техника шығады.

Елордада қазір 4 полигон жұмыс істеп тұр. Қаладағы қардың көптігі соншалық сырттағы полигондарға да сыймай жатыр.

Дегенмен мынадай ұйытқып соққан боранды көрген кезде Нұр-Сұлтан қаласының іші жуық арада қардан толық тазартылады дегенге тағы да күмән келтіріп қалдық.

Оңғар АЛПЫСБАЙҰЛЫ