Жаңалықтарды Telegram арнамыздан оқыңыз!Таяу үш жылдың ішінде «электронды үкіметтің» жоғары сұранысқа ие қызметтерін мобильді форматқа көшіру жоспарланған, деп мәлімдеді бүгін Астанадағы III Жаһандық «электронды үкімет» форумының (Global e-Government Forum -2014) алаңында өткен баспасөз конференциясында ҚР Инвестиция және даму вице-министрі Асқар Жұмағалиев.
«Электронды үкіметті дамытудың келесі кезеңі - бұл мобильді үкіметті дамыту. Биылдың өзінде жоғары сұранысқа ие 50-ге жуық қызметті ұсынғымыз келеді. Одан кейін үш жылдың ішінде қазіргі таңда үкімет порталындағы бар барлық қызметті мобильді үкіметке ауыстыру болжанып отыр»,- деді А.Жұмағалиев.
Сонымен бірге, ол халық арасында ұялы байланыстың кең таралуы мобильді үкімет сервистерін белсенді енгізуді бастауға мүмкіндік беретінін атап өтті.
Сондай-ақ, вице-министрдің айтуынша, халық электронды қызметтерді тек планшеттер мен смартфондар арқылы ғана емес, қарапайым ұялы телефондар арқылы да, электронды қолтаңбаны пайдалана отырып қолдана алады, деп хабарлайды primeminister.kz.
