Қазақ-британ ғалымдары жер серіктерін жасап жатыр

Ғарыш аппараттарын жасау үшін Қазақстан ғалымдары британдық әріптестерімен бірлесіп жұмыс істемек. Бұл туралы ҚР Инвестициялар және даму министрлігі аэроғарыш комитеті төрағасының орынбасары Мейірбек Молдабеков айтты.

Оның айтуына қарағанда қазақ-британ ғалымдары екі ғарыштық аппаратты жасау үшін еңбек етіп жатқан көрінеді. Бұл аппараттардың бірі технологиялық бағытта болса, екіншісі ғылыми ғарыштық аппарат екен. Алғашқысы болашақта отандық ғарыш аппаратын жасауға қажетті плафторма жасау үшін әзірленіп жатыр. Ал, ғылыми ғарыштық аппарат жер сілкіністерін болжау үшін әзірленбек.

Астанада өткен «Қазақстандағы ғарыш күндері-2015» деп аталатын халықаралық семинарда Мейірбек Молдабеков еліміздің ғарыштық өнімдер өндіретін және ғарыштық қызмет көрсететін жаһандық жетекші мемлекеттердің қатарына қосылуды көздеп отырғанын айтты. Бүгінде Қазақстан ғарыш саласында Ресей, Украина, Франция, Израиль, Германия, Оңтүстік Корея, Таиланда, Сауд Аарабиясы, Біріккен Араб әмірліктері, Нидерланды, Жапония және бақса да елдермен тығыз қарым-қатынас орнатқан.