Пхенчхан-2018. «Қазақстан» телерадиокорпорациясының қызметкерлері жауапты жарыста жұмыс істеуге дайын (ВИДЕО)

Қысқы Олимпиаданың басталуына санаулы күндер қалды. Дүбірлі дода қатысушыларының алғашқы легі Пхенчханға келіп жетті. Спортшыларға арналған олимпиадалық қалашық екеу. Таулы және жағалау маңындағы кластерлерде орналасқан.

Ақ Олимпиада қатысушыларының басы-қасында жүріп, оқиға орнынан материал дайындайтын БАҚ өкілдерінің қарасы қалың. Спорттық нысанға кіруге мүмкіндік беретін аккредитациялар мен бейнетүсірілім жүргізуге рұқсат беретін арнайы қағаздарды журналистер халықаралық хабар тарату орталығынан алады.

Еріктілер мен жанкүйерлер үлкен спорт мерекесін тағатсыздана күтуде. Пхенчханға келіп жеткен «Қазақстан» телерадиокорпорациясының қызметкерлері де жауапты жарыста жұмыс істеуге дайын.