Ата заңдағы «әркімге» қатысты пікірлерге Елбасы нүкте қойды

«Заң адамның пайдасына жазылады, адам заң үшін тумайды» деген тағылымды тәмсіл айтқан Алаш көсемі Әлихан Бөкейханның бүгін туған күні. Сол бабалардың тура жолын жалғаған бүгінгі ұрпақ елінің ертеңі үшін Ата заңын заман кейпіне сай өзгерту ниетімен талқы таразысына тартып жатыр. Тағы сол Әлиханның нақылы біздің нақты ұстынымыз: Бостандыққа апаратын жалғыз жол – ұлттық ынтымақ қана.

Ай өтті, Ата заңға енгізілетін өзгерістерді ақтарып-төңкергенімізге. Қоғам сергек қазір. Ешкім елдің азаматы ретінде бұл шарадан тыс қалмады, тарс бүркеніп жатып алған жоқ. Әркім әлеуметтік желіде әрқилы пікір айтты. Әсіресе «әркімге» қатысты. Әу баста екіге жарылған екіұдай пікірге әдеттегідей Қазақ Президенті Нұрсұлтан Назарбаевтың өзі нүкте қойды, осы аптада.