Конституциялық реформа бізге не береді?

Қазақстанда ширек ғасыр бойы мықты Президенттік басқару жүйесі салтанат құрды. Себебі, аумалы-төкпелі кезеңде екі тізгін, бір шылбырды берік ұстайтын тегеурінді билік ауадай қажет болды. Сондықтан, өтпелі кезеңде Президент бүкіл жауапкершілікті өз мойынына алды.

Орталықтандырылған басқаруға қатысты талай сын айтылды да, талай наз білдірілді. Бірақ, нәтижесі міне, ең бастысы, қысқа мерзімде мемлекеттілігімізді қалыптастырып, халықаралық қауымдастықта елдігіміздің еңсесін тіктеп алдық.

Халықтың та саяси сауаты мен мәдениеті жетіліп, қоғамдық үлкен өзгерістерге ұстанымдарын парасатты түрде жеткізе алатын деңгейге көтерілді. Әлем де сәт санап өзгеріп жатқандықтан дүние өркениеті көшінен қалмау үшін, қоғамды одан ары демократияландыруға кірісу - заман талабы. Сондықтан, мемлекеттік басқаруды жетілдіретін тағы бір толағай реформа қоғам талқысына ұсынылды.