Ұзақмерзімді стратегиясы бар елдер

Президент биыл бірінші рет халыққа Жолдауын баспасөз арқылы жазбаша жариялады. Жолдауды елеңдей күтетін ел-жұрттың көбі қазір ғаламторға жүгінетіні белгілі. Ал, енді жаңа Жолдауда қандай сөздер ең көп айтылды екен деп зерделеп көрсек, «Мемлекет» сөзі 37 рет аталған. «Экономика» сөзі 36 рет, ал «Қазақстан» және «қазақстандықтар» сөзі 31 рет айтылыпты. «Міндет» сөзі - 22, «ұлттық» сөзі 18 мәрте тілге тиек болған. «Қажет» және «керек» сөздерінің Жолдауда 60-тан астам рет ұшырасуы әлі де алда атқарар міндеттердің зор екенін меңзейтіндей. Жалпы, Президенттің биылғы Жолдауы 4103 сөзден тұрады.

Өткен ғасырдың орта шенінде әлемнің талай елінде дамуға бағытталған индустрияландыру бағдарламалары мен түрлі стратегиялар, ұзақмерзімді жоспарлар қабылданды. Соның нәтижесінде Жапония мен Оңтүстік-Шығыс Азия мемлекеттері қарқынмен дамып, өзгелер үшін өркендеудің моделіне айналды. Бұл реформалардың ерекшелігі сол - жеке сектор мен кәсіпкерлікті ілгерілетуге баса мән берілді. Ал, соңғы екі жылда ғаламның мұнай нарығындағы ахуалы өзгерді. Бұл жағдай шикізатқа тәуелділіктің неге әкеп соқтыратынын көрсетіп берді. Сондықтан, былтыр Сауд Арабиясы да өз өндірісін әртараптандыруға көшті. Экономикаға деген жаңа көзқарас кімдерді қандай дәрежеге жеткізді?
Арыстан РЫСБЕК