Бөрі бейнесіндегі солтүстік шұғыласы

Швецияның солтүстігіндегі Пажала елдімекенінде солтүстік шұғыласының фотосын түсіріп жүрген Маржа Тертту Карлссон таңғажайып көрініске куә болған. Ол солтүстік шұғыласының қасқыр бейнесіне ұқсайтын көрінісін суретке түсіріпті. Бұл бейнені әлеуметтік желілердің қолданушылары екі күн ішінде 32 мың рет бөліскен.

Швецияның SVT телеарнасының веб-сайтында тұрған фотоға қызығушылардың саны өте мол. Біраз адамдардың бұл фотоның фотошоп арқылы өңделгенін айтуына байланысты Маржа Тертту Карлссон өз пікірін білдірді. Ол өзінің фотошоппен жұмыс істей алмайтындығын, тіпті компьютеріне бұл бағдарламаны орнатпағанын да алға тартқан. Фотограф: «Өткен жылы солтүстік шұғыласын фотоға түсіріп жүрген кезде тауыс құсына ұқсас бейнені кездестіргенмін. Бәлкім, алдағы уақытта аспаннан аюдың бейнесін көретін шығармын»,-деп мәлімдепті.