Жаңалықтарды Telegram арнамыздан оқыңыз!Ақтөбеде академик Әлкей Марғұланды еске алуға арналған «Рухани жаңғыру және археологиялық мұра. Марғұлан оқулары – 2018» атты халықаралық конференция өтті. Екі күн бойы еліміздің аймақтарынан және Ресей, Украина, Әзірбайжан, Өзбекстан, Қырғыз елінен келген тарихшылар, археологтар, өлкетанушылар мен этнографтар Қазақстанның киелі жерлері туралы баяндады.
Сондай-ақ, конференцияға академиктің қызы Данель Марғұлан да қатысты. Ол әкесінің осы саладағы еңбектерін айтып еске алды. Шығыстанушы Әлкей Марғұлан Қазақстанның ежелгі және ортағасырлық тарихын зерттеген. Әйгілі Беғазы-Дәндібай мәдениетін алғаш ашқан. Әрі археология және этнография мектебінің негізін қалаушы.
Данель Марғұлан, Ә.Марғұланның қызы:
- Мен осыған дейін Ақтөбеде болған емеспін. Ерекше әсерде тұрмын. Өткен ғасырдың 50-ші жылдары әкем батыс өңірінде қазба жұмыстарын жүргізді. Кейін, ол батыстан шығысқа қарай 1000 шақырым жүріп, Шыңғыстау, Тарбағатай тауларын аралады.
