Астанада аударыспақтан өтетін халықаралық турнирдің жүлде қоры - 5 млн.700 мың теңге

Аударыспақтан халықаралық ашық турнирде бас жүлдені жеңіп алған түйе палуанға 1 миллион теңге көлемінде сыйақы беріледі. Бұл туралы бүгін Ұлттық спорт түрлері қауымдастығының президенті Бекболат Тілеухан мәлімдеді. Төл спортты насихаттайтын байрақты бәсекенің жалпы жүлде қоры - 5 миллион 700 мың теңге. Білектілер айқасына қазірде Венгрия, Ресей, Қытай, Моңғолия, Өзбекстан және Қырғыз елінің өкілдері қатысуға ниет білдіріп отыр. Олардың арасында тіпті америкалық палуан да бар. Ал, бұл сайыста еліміздің намысын Біржан Қосалиев пен Сырым Ізбасаров сынды азулы майталмандар қорғамақ. Тамыздың 17-і мен 18-і аралығында «Қазанат» ипподромында өтетін бәсеке «ЕХРО-2017» халықаралық көрмесіне орайластырылған.

Елдос САПАРҒАЛИ