Спорт ардагерінің футбол мұражайы

Бір жарым миллионнан астам сурет, 388 альбом, сансыз дипломдар, кубоктар мен медальдар. Бұл Шымкенттегі футбол мұражайының қысқаша сипаттамасы. Мұндай құнды дүниені жинап сақтауға спорт ардагері Махамбет Сапарбаев қыруар қаржы жұмсаған.

Бірнеше бөлмеден тұратын мұражайда шеге қағар орын жоқ. Махамбет Сапарбаев өзі ұста, өзі дизайнер. Суреттерді де бей-берекет іле салмайды.

Олардың арасында бүгінде футболдан Ұлттық құрама капитаны Таңат Нөсербаевтың суретіне көзіміз түсті. Фото 2003 жылы түсірілген екен. Еліміздің өзге де белді былғары аяқ доп шеберлері туралы мол мағлұматты да дәл осы жерден табуға болады. Мұндағы әрбір экспонат қазақ футболының бір бөлшегі, болашақ ұрпақтың байлығы.