ЕуроОдақ транскаспий дәлізін дамытуға инвестиция бөлмек

«Қарт құрлыққа төнетін қауіп-қатерлерге қарсы тұру үшін Еуропалық қауіпсіздік кеңесін құру қажет». Еурокомиссия төрағасы Урсула Фон Дер Ляйен бүгін Страсбургте осындай ұсыныс жасады. Еуропарламент депутаттары алдында Одақтың болашағына қатысты баяндама жасаған Төраға қорғанысты, энергетикалық қауіпсіздікті күшейтуге басымдық беру қажеттігін айтты. ЕуроОдақ энергияның баламалы көздерін дамыту арқылы қазба отын импортына жұмсайтын шығынды жылына 260 млрд еуроға қысқартпақ. Комиссия төрағасы экономиканы, сыртқы шекараларды нығайту, Украинаны қолдау, климаттық өзгерістерге бейімделу, жасанды интелектіні дамытуға бағытталған жоспарларымен бөлісті. Урсула Фон дер Ляйен маңызды шикізат бойынша еуропалық корпорация құру туралы ұсыныс жасады. Орта дәлізбен Қытайдан Қазақстан арқылы Еуропаға жүк тасымалдауды күшейту де өзекті мәселе. ЕуроОдақ осы Транскаспий халықаралық көлік дәлізін жетілдіруге күш салмақ.