Сенімді ақпарат – қауіпсіздік кепілі

Әлеуметтік желілерде күмән тудыратын кейбір діни ақпараттарды әрбір қолданушы дереккөзді мұқият тексергені абзал.

«Нұр-Мүбәрак» университетінің проректоры, исламтанушы-ғалым Ершат Оңғар осылай дейді. Оның сөзінше, қазіргі ақпараттық кеңістікте діни контентті тұтынудың маңыздылығын ескерген жөн. Тексерілмеген мәліметтер жеке адамның дүниетанымына теріс әсер етіп қана қоймай, қоғамда адасушылық пен радикалды көзқарастардың қалыптасуына әкелуі мүмкін. Әсіресе, жастардың әлеуметтік желілер арқылы таралатын контентке тез сенгіш келетінін ескерсек, бұл мәселе одан сайын өзекті бола түседі. Жалпы, діни контентті дұрыс әрі жауапкершілікпен тұтыну – қоғамның тұрақтылығы мен рухани қауіпсіздігінің кепілі, дейді Ершат Оңғар.

Діни мазмұндағы ақпараттың қауіп-қатері бар, әсіресе қазіргі заманда дін мәселесі жөнінде адамдар жауапкершіліксіз ойын айта салатын жағдайға көшті. ҚМДБ ресми сайтынан, ресми дін қызметкерлерінің сөзінен ақпарат алуға, соларға сүйенуге шақырамыз.