Киберқауіпсіздіктің кешенді экожүйесі қалыптасады

Әлемдік киберқауіпсіздік саласындағы үздіктердің бірі Palo Alto Networks компаниясы Қазақстанда кешенді экожүйе қалыптастыруға ниетті. Бұл туралы бүгін ЖИ және цифрлық даму министрлігі мен аталған компания өкілдерінің кездесуінде белгілі болды. Тараптар өзара келісілген меморандумды жүзеге асыру барысы мен алдағы стратегиялық жоспарларды талқыға салды. Екі жақ бес жылға арналған ортақ жұмыс жоспарын әзірлеуге келісті. Ал Innovation Day іс-шарасында спикерлер сөз сөйлеп, қазіргі кезеңдегі сын-қатерлерді атап, олармен күресудің жолын көрсетті.

Әлемде болып жатқан қазіргі геосаяси жағдайға байланысты киберқауіпсіздік мәселесі бірінші орынға шығып отыр. ЖИ мен интернет жылдамдығының артуы жаңа қауіп-қатерлерді де қатар алып келді. Сондықтан цифрлық қауіпсіздік аса маңызды. Біз Қазақстанда кешенді экожүйе қалыптастыруға жұмыс істеп жатырмыз. Бұл экожүйе аясында мемлекеттік құрылымдармен тығыз байланыста жұмыс істеп, интернет кеңістігін ғана емес, сонымен қатар инфрақұрылымды да қорғауды мақсат етеміз.