Маңғыстауда ауаға газ-су қоспасы атқылап жатыр

Маңғыстауда Солтүстік-Шығыс Қаратұрын кен орнында төтенше оқиға болып, ауаға газ-су қоспасы атқылап жатыр.

Облыстық төтенше жағдайлар департаментінің мәліметінше, кеше сағат 12:00 шамасында «Солтүстік-Шығыс Қаратұрын» кен орнында № 403 ұңғымада мердігерлік ұйым бұрғылау жұмыстарын жүргізу кезінде, газ-су атқылап кеткен. Апаттың салдарынан өрт болмаған және зардап шеккендер жоқ. Қазіргі уақытта кәсіби авариялық-құтқару қызметтері күш біріктіріп, авариялық жағдайды жою үшін дайындық жұмыстарын жүргізуде. Еске салайық, бұған дейін Оңтүстік Қаратұрын кен орнында ұңғыманы жөндеу кезінде, технологиялық процестердің сақталмауынан өрт шығып, ол жарты жылдан кейін әрең өшірілген болатын.