Түркияда оқушы мұғалімін пышақтап өлтірген

Түркияның Ыстанбұл қаласында жантүршігерлік қылмыс тіркелді. Мектеп оқушысы өзіне сабақ беретін мұғалімді пышақтап өлтірген. Сабаққа пышақ алып келген жоғары сынып оқушысы тағы бір мұғалім мен оқушыны да жаралады. Мұндай қылмысқа жасөспірімнің неліктен барғаны әзірге белгісіз.

Кеше жергілікті уақытпен таңертеңгі сағат 11:00 шамасында Ыстамбұл қаласындағы мектептердің бірінде 11-сынып оқушысы өзіне сабақ беретін апайды пышақтап, 44 жастағы мұғалім Фатима Нұр сол жерде жан тапсырды. Қылмыс жасаған жасөспірім онымен де тоқтамай басқа бір сыныпқа барып, ол жерде тағы бір мұғалім мен оқушыны жаралаған. Сабақ уақытында пышақ ұстап әр сыныпқа кіріп жүрген оқушыны мектеп директорының орынбасары ұстап алып полицияға тапсырады. Ауыр жараланған мұғалім мен оқушы ауруханаға жатқызылды. 17 жастағы оқушының мұндай қатыгездікке неге барғаны әзірге белгісіз, қылмыстық іс қозғалып тергеу жүріп жатыр. Ал қоғамды дүр сілкіндірген осы оқиғадан кейін мұғалімдер Ыстамбұл мектептерінде қауіпсіздік тиісті деңгейде сақталмайтынына шағымданып, екі күндік ереуіл жариялап, жұмысқа шығудан бас тартты.