Щучинск қаласында дәмханадағы жарылыс кезінде 7 адам қайтыс болды

Ақмола облысының Щучинск қаласындағы дәмханалардың бірінде газ баллоны жарылды. Құзырлы орган өкілдерінің хабарлауынша жарылыс түнгі 22:00 шамасында болған. Салдарынан 7 адам қаза тапты. Барлығы 27 адам зардап шеккен. Оқиға орнына 5 минутта жеткен өрт сөндірушілер қызыл жалынға оранған ғимараттан 10 адамды құтқарып үлгерді. Сондай-ақ 8 газ баллонын шығарған.

Елдос Рамазанов, облыс әкімінің бірінші орынбасары:

Оқиғаның себеп-салдары анықталып жатыр. Осы жерде қазір барлық жедел қызмет өкілдері жұмыс істеуде. Қайғылы оқиғадан зардап шеккендер мен қайтыс болғандардың отбасына Ақмола облысының әкімдігі тарапынан барлық қажетті көмек көрсетіледі.

Жаңа ғана келіп түскен ақпарат, қаза болған 7 адамның 5-і әйел, 2-і ер адам. Барлығы дәмхана қызметкерлері. Оның ішінде 16 жастағы жасөспірім бар. Ақмола облысы Төтенше жағдайлар департаментінің жанынан  8 7162 51 42 98 нөмірі бойынша  жедел желі ашылды.