Маңғыстауда автобус құлап, 4 адам қаза тапты

Маңғыстауда Ақтау – Бейнеу автожолында автобус жол апатына ұшырап, 4 адам қаза тапты. Тағы 17 адам ауруханаға жеткізілді. Қоғамдық көлікте 50 жолаушы болған. Аймақтағы тілшіміз Аягөз Оралбайқызы тікелей эфирге қосылды. Аягөз, зардап шеккендердің жағдайы қалай? 

Аягөз Оралбайқызы, тілші:

Қайырлы күн, Айнұр, жол көлік оқиғасы түнде, сағат 01-30 шамасында болған. Алдын ала мәліметтерге сүйенсек, жүргізуші көлік тізгініне ие бола алмай, автобус жол жиегіндегі орға құлаған. Жол-көлік оқиғасының салдарынан 4 адам оқиға орнында қаза тапты. 42 жолаушы түрлі дене жарақаттарын алған. Денсаулық сақтау басқармасының мәліметінше, 4 адам жансақтау бөліміне жатқызылды. Тағы 13 жолаушы травматологиялық бөлімде ем алуда. Ал, қалғандары үйлеріне жіберілген. Осы дерек бойынша қылмыстық іс қозғалып, автобус жүргізушісі уақытша ұстау изоляторына қамалды.