Елде генетикалық ауытқуларды анықтаудың тың тәсілі қолданысқа енді

Астаналық дәрігерлер эмбриондарға генетикалық зерттеу жүргізудің жаңа әдісін енгізді. Бұл патологияны ерте анықтап, сау сәбидің дүниеге келуіне мүмкіндік береді. Мамандардың айтуынша, мұндай зерттеу бұған дейін Қазақстанда жасалмаған. Бұрын биопсия үлгілері шетелге жіберіліп, пациенттер нәтижесін бір ай күтетін. Енді жаңа технологияның көмегімен эмбрионның сапасын небәрі бір апта ішінде анықтауға болады. Осылайша, Даун, Эдвардс синдромдары сияқты генетикалық ауытқуларды және тұқым қуалайтын церебралды сал ауруын эмбрион кезінде анықтау мүмкіндігі туды. Дәрігерлер соңғы уақытта ЭКО бағдарламасына жүгінетін 30 жасқа дейінгі әйелдердің қатары көбейгенін айтады. Осы уақытқа дейін зерттеуден өткен эмбриондардың 50 пайызынан патология табылған. Генетикалық зерттеудің нәтижесінде жыл басынан бері 196 сау нәресте дүние келген.

Жұлдыз Асқарқызы, жас ана:

Өзім 35-ке келгенде көтердім, сол себепті бірінші тексеріп алайын дедім, ұрықтың сапасын. Қазір аурулар көп, сол себептен барлығын тексеріп, көтеріп балалы болдық.

Алдияр Мәлік, эмбриолог-генетик:

Бұған ЭКО жасайтындар ғана жүгіне алады. Пациенттен 5 эмбрион алдық мысалы, 5-еуін де зерттеуге жібердік. Ол бесеуінің барлығы сау болмайды. Біз нақты білеміз қай эмбрионды алатынымызды.