11 жыл бұрын жоғалған ұшақты қайта іздейтін болды

Малайзияның көлік министрлігі 11 жыл бұрын жоғалып кеткен «Боингты» іздеу операциясын желтоқсанның 30-да қайта жалғастыратынын жариялады. 370-ші рейс 2014 жылы Куала-Лумпурдан Бейжіңге ұшып бара жатып радардан ғайып болған. Оның бортындағы 227 жолаушы мен экипаждың 12 мүшесінің тағдыры әлі белгісіз. Ұшақ содан бері талай рет іздестірілді. Алайда нәтиже жоқ. Дегенмен осы лайнерге тиесілі болуы мүмкін сынықтар Африка мен Үнді мұхитындағы аралдардың жағалауынан табылды. 2018 жылы жарияланған баяндамаға қарағанда, «Боингтың» бағыты әдейі өзгертілсе керек. Бірақ оған кім жауапты екенін тергеушілер әзірге анықтай алмай отыр.