Жамбыл облысында көлік апатынан 185 адам қайтыс болған

Ал Жамбыл облысында былтыр жол апатынан 241  адам ажал құшса, биыл 185 азамат опат болған. Жолапатының кесірінен болатын өлім-жітім 26 пайызға азайған. Өңірдің бас полицейі  өзі бастап, тас жолдағы тәртіпті қадағалады. Қызметкерлердің құрылғыларын қарап, көлігіне дейін көз жүгіртіп шықты. Жаңа алынған жабдықтардың ұтқырлығын байқады. Генералдың сөзінше, апаттың басым бөлігі түн ортасы мен таңға жуық болады. Айта кетейік, енді аймақта автобустар мен жедел-жәрдем көліктеріне айыппұл жазатын камералар орнатылмақ.

Қайсар Сұлтанбаев, облыстық Полиция департаментінің бастығы:

Жәй автокөліктерге орналастырылған құрылғылар жол ережесін бұзу фактілерін 2-3 есе көп тіркеп жатқандығы бәрімізге белгілі. Енді бұл жердегі мәселе елдің бәріне айыпұл салып, хаттама толтыру емес. Біз бүгін «Заң мен тәртіп» қағидасы шеңберінде жалпы халықтың жол ережесін сақтасын деген мақсатта жұмыстарды атқарудамыз.

Бүгінде облыстағы «Батыс Еуропа – Батыс Қытай» автодәлізі бойына қашықтықтан бақылайтын дрон да жұмылдырылған. Пилотсыз басқарылатын құрылғы автобан бойын 15 шақырымға дейін бақылап,  әуеде 40 минут ұша алады. Ал жыл басынан бері дрон көмегімен 400-ден астам көлік жүргізушісінің қарсы бетке шығып кеткені анықталған.