Павлодар облысында кәнігі ұрылар ұсталды

Павлодар облысында екі жыл қатарынан мал ұрлаумен айналысқан қылмыстық топ ұсталды. Олардың бәрі Май ауданының тұрғындары. Күдіктілер алысқа бармай-ақ өздері тұратын ауылдың адамдарын қан қақсатқан. Сауып отырған сиыры мен бірді-екілі жылқысынан айырылғандардың арасында мүгедек адамдар, тіпті жасы 85-гі кейуана бар. Ұрыларды ұстау үшін облыстық Полиция департаменті арнайы операция жоспарлап, жедел әрекет жасауға арналған арнайы жасақ апарды. Тоғыз адам ұсталды.

Қанат Қайыргелдинов, қылмыстық Полиция басқармасының бөлім бастығы:

Олардың үшеуі қамауға алынды. Алдын ала дерекке сәйкес, күдіктілер 2024-2025 жылдар аралығында алдын-ала сөз байласып, Май ауданында еркін жайылымда жүрген 29 бас ірі қара мал және 7 бас жылқыны ұрлағаны анықталды. Кейін оларды бөліп, етін сатып жіберген.

Жыл басынан бері Ертіс-Баян өңірінде мал ұрлығына қатысты 52 дерек тіркелді. 252 бас мал иелеріне қайтарылды. Қазір аймақта «мал ұрлығы» жедел алдын алу шарасы өтіп жатыр.