Түркияда фабрикадағы жарылыстан 6 адам көз жұмды

Түркияның Қожаелі провинциясында иіссу фабрикасының қоймасында жарылыс болып, алты адам қаза тапты. Таңғы уақытта шыққан өрт тез арада жайылып, бөшкелерде тұрған парфюм дайындайтын химиялық сұйықтықтар жарылған. Апат кезінде қойма ішінде болған бірнеше адам өз күштерімен қашып шыққанымен, алты әйел тілсіз жаудың құрбаны болды. Олардың үлкені 65 жаста болса, ең кішісі 16 жаста екені анықталды. Сондай-ақ жеті адамды күйік шалған. Олардың біреуінің жағдайы ауыр, дейді дәрігерлер. Оқыс оқиғадан кейін шетелге қашпақ болған фабрика басшысы мен тағы екі адам қамауға алынды. Қазір мамандар өрттің нақты неден шыққанын анықтап жатыр.