Ресей мен Қазақстан шекарасындағы өткізу бекеті ішінара жөндеуге жабылады

Батыс Қазақстан облысында Ресей мен Қазақстан шекарасындағы «Сырым» өткізу бекеті ішінара жөндеуге жабылады. Қайта жаңғырту шілденің 10-да басталады. Жүк көліктеріне шектеу жоқ. Тек жеңіл көліктерге жүруге тыйым салынады. Жолаушылар автобусы да өзге өткізу бекетінен өтуге мәжбүр болады. Жоба құны – 22 млрд теңге. Қазір жөндеуге 9,9 млрд теңгесі бөлінген. «Сырым» бекеті арқылы тәулігіне 1200 көлік өтеді. Қазір бекетте 6 жолақ болса, жаңғыртудан соң жолақ саны 14-ке дейін ұлғаймақ.

Мирлан Насипов, «ҚазАвтоЖол» ҰК» АҚ облыстық филиалы директорының орынбасары:

Мердігер анықталды. Құрылыс-монтаж жұмыстары 10 шілдеде басталады. Жобаның мерзімі - 16 ай. Заманауи инспекциялық-тексеру кешендері орнатылады. Әкімшілік ғимараттар салынады.

Саламат Кенжеғұлов ҚР ҰҚК Шекара қызметі облыстық Шекаралық бақылау басқармасы бастығының міндетін уақытша атқарушы:

Жүк көліктері «Сырым» шекаралық бақылау бөлімшесінде қалады. Ал жеңіл көліктер үш бөлімшеге жіберіледі. «Шаған» шекаралық бақылау бекеті арқылы Қазақстан мен Ресей азаматтарына арналған. Тасқала және Ақсай – халықаралық бекеттер.

Ардақ Мұратқызы