Алакөлде жағаны бекіту жұмыстары басталады

Алакөлде 13,5 шақырымға созылатын жағалауды бекіту жұмыстары басталады. Жыл сайын көл суы жағалауды шайып, Ақши мен Көктұма ауылдарына қауіп төндіріп келеді. Жобаның жалпы құны — 19,1 млрд теңге. Құрылыс республикалық бюджет есебінен қаржыландырылмақ.

Санжар Қабдыбек, Жетісу облысы Құрылыс басқармасы басшысының орынбасары:

Қазір конкурстық процедуралар өтіп жатыр. Мамырдың 20-сына дейін нәтижесін алуды жоспарлап отырмыз.

Бекіту жұмыстарына байланысты 70-тен астам демалыс орны сүріледі. Жер телімдері мемлекет мұқтажына алынса да, материалдық шығын өтелмейді.

Мәулен Төлеужанов, Алакөл ауданы әкімінің орынбасары:

74 жер телімі бекіту аймағына түсіп отыр. Жер иелеріне басқа аумақтан учаске беріледі. Бірақ өтемақы қарастырылмаған.

Жобаның аясында жағалауға арбат, ойын-сауық алаңы және сауда нысандары салу жоспарланған.

Дамир Нұрмұхамед