Жаңалықтарды Telegram арнамыздан оқыңыз!Түркістан облысының Ордабасы ауданында көзі тірі жалғыз соғыс ардагері тұрады. Жүз бір жастағы Қалмен Мұратов 7 сынып оқып жүргенде әскер қатарына шақырылып, Аягөздегі бір айлық командирлік курстан өткен. Кіші сержант шенін алып Беларусь майданында соғысқа араласқан. Екі жыл қан майданда талай ұрысқа қатысқан.
Бадам ауылында тұратын Қалмен Мұратов 18 жасында майданға аттанып, Беларусь жерінде соғысқа қатысқан. Ржев – Великие Луки және басқа да көптеген қаланы неміс басқыншыларынан азат етуге күш салған. Екі жыл қан майданда талай ұрыста болып, Витебск қаласын жаудан азат ету кезінде қатты жараланып, 1944 жылы елге оралған.
Жетісай ауданында да жалғыз ардагер қалған. Биыл 100 жасқа толған Петр Попков Польша, Чехословакия, Югославия, Молдавия, Румыния, Венгрия, Болгарияны азат етуге қатысқан. Ауданда тағы 246 тыл ардагері тұрады. Солардың бірі Әнуар Әлімбек биыл 90 жастан асты. Қызылқұм ауданында туған қария соғыстан кейін колхозда еңбек еткен.
Әнуар Әлімбек, тыл ардагері:
Ол уақытта мақта болды, азырақ болды. Мақта теру де оңай емес еді. Оны теріп, өткізіп, онда комбайн жоқ. Қолмен орып алады ғой. Қолмен орып алады, жинайды.
Қазір Түркістан облысында 200 мыңға жуық зейнет жасындағы қария тұрады. Олардың 9-ы соғыс ардагері болса, 3 мыңнан астамы тыл еңбеккері. Жеңістің 80 жылдығына орай әрбір соғыс ардагеріне 5 млн теңгеден сыйақы берілмек.
Айнұр Әбілқасымқызы
