Жаңалықтарды Telegram арнамыздан оқыңыз!Бес күн бұрын қамауға алынған Стамбұл қаласының мэрі Екрем Имамоғлын сот тұтқындау туралы шешім шығарды. Сот шешімінен соң ол түрмеге қамалды. Оған жемқорлық жасады деген айып тағылып отыр. Ал лаңкестік ұйымға көмектесті деген айып бойынша әлі тергеу жүріп жатыр. Сот шешімінен соң Түркияның бірнеше ірі қаласында шерулер үдей түсті. Бауырлас елдегі жағдайды білу үшін бізге Түркиядағы тілшіміз Айдос Әшімұлын қосамыз. Айдос, соңғы ахуалды білсек?
Айдос Әшімұлы, тілші:
Кеш жарық Армангүл! Шерулер негізінен Стамбұл, Анкара және Измир қалаларында өтіп жатыр. Митингілер кешкі уақытта басталып, түн ортасына дейін жалғасуда. Наразылық акциялары кезінде бірен-саран полициямен қақтығысты есептемегенде, негізінен бейбіт түрде өтіп жатыр. Бүгінге дейін шеру кезінде полицияға қарсы күш қолданған және қоғамдық мүлікті бүлдірген 1133 адам қамауға алынды. Ел билігі 28 наурыз күні Стамбұл қалалық мәслихаты тұтқындалған мэрдің орнына жаңа басшы сайлауы тиіс екенін айтты. Алайда оппозиция өкілдері Екрем Имамоғлыдан басқа басшы сайламайтындықтарын, ол тұтқыннан босатылмайынша шерулерді тоқтатпайтындарын мәлімдеді.
- Айдос, Түркияда оқып жатқан студенттердің, жалпы сол елдегі қазақстандықтардың жағдайы қалай? Оларға қауіп төніп тұрған жоқ па?
Айдос Әшімұлы, тілші:
Иә Армангүл, Түркиядағы Қазақстан азаматтарына ешқандай қауіп төніп тұрған жоқ. Жалпы қалада жағдай тұрақты. Шерулер тек әкімдік алдындағы алаңда ғана өтіп жатыр. Дегенмен Қазақстанның Түркиядағы елшілігі ел азаматтарын халық көп жиналатын орындарға бармауға және шерулерге қатысудан бас тартуға шақырды. Сондай-ақ Түркиядағы дипломатиялық өкілдіктермен байланыста болып, хабарландыруларға құлақ түре жүруді ескертті. Сонымен қатар әлеуметтік желілерде осы шерулерге қатысты пікір білдіріп, ақпарат бөлісуден сақ болу жөн екендігін де білдірді. Армангүл!
Айдос Әшімұлы
