Жаңалықтарды Telegram арнамыздан оқыңыз!АҚШ Укранина барлық әскери көмекті беруді тоқтатты. Трамп бұған қатысты елдің қорғаныс министріне арнайы тапсырма берген. Бұл жайлы Ақ үйдің ресми өкілі мәлімдеді. Меншікті тілшіміз Жалғас Сәдібекұлы тарқатады.
Жалғас Сәдібекұлы, тілші:
Ақ үйдегі сәтсіз келіссөздердің салдарын Украина бірнеше күн өтпей-ақ сезді. Трамп әскери көмектің кез келген түрін беруге уақытша тыйым салды. Осы арқылы АҚШ Украинаны Ресеймен мәмілеге келуге мәжбүрлемек.
Дональд Трамп, АҚШ президенті:
Мен оның тез аяқталатынын көргім келеді. Қырғынның жылдар бойы жалғасқанын қаламаймын. Президент Зеленский бүгін ассошейтер пресске мәлімдеме жасап, соғыс ұзаққа созылады, деп ойлайтынын айтыпты. Бұл дұрыс мәлімдеме емес. Мен соны айтқым келеді.
Жалғас Сәдібекұлы, тілші:
Кейбір мәліметтерге қарағанда, Трамптың шешімі АҚШ-тың Украинаға жеткізілмеген барлық әскери көмегіне қатысты болмақ. Тіпті, Польшаға жетіп, шекара асқалы тұрған қару-жарақтар да берілмейді. Бірақ, Зеленский де шегінгелі отырған жоқ.
Владимир Зеленский, Украина президенті:
Қауіпсіздік кепілдіктерінің болмауы себепті Ресей 11 жыл бұрын Қырымды басып алды және Донбаста соғыс бастады. Кейінірек, қауіпсіздік кепілдіктерінің болмауы Ресейге толық ауқымды басқыншылық бастауға жол ашып, Ресей бұл соғысты жалғастыруда. Бүкіл әлем мұны көріп отыр және бүкіл әлем мұны растап отыр.
Жалғас Сәдібекұлы, тілші:
Украина кез келген сценарийге қамданып жатырмыз дегенімен негізгі әскери көмекті беріп отырған АҚШ-тың жәрдемінсіз соғыс алаңында қиын жағдайға тап болмақ. Американың ресми өкілдерінің хабарлауынша, Украинаның қолында бар қару жарақ жылдың ортасына дейін ғана жетуі мүмкін. Одан кейін Ресей әскеріне төтеп беру қабілеті едәуір азаймақ.
Жалғас Сәдібекұлы
