Қордай ауданында толассыз жаңбыр соңы тасқынға ұласты

Жамбыл облысы Қордай ауданында таудан тасқын жүріп, дүлей дауыл тұрды. Су басу салдарынан Бетқайнар ауылдық округінде 700-ге жуық ұсақ мал, 10 бас жылқыны су ағызып әкеткен. Алайда әкімдік мал өлекселері табылмады деп отыр. Тасқын толассыз жаңбырдан кейін пайда болған. Тілсіз жау Соғанды-Бетқайнар автожолының көпірін бұзып өткен. Әкімдік мәліметінше, үйлерге су кірмеген. Алайда жойқын желден Соғанды ауылында жарық жоқ. Беріктас елді мекенінде 200-ден астам үй мен 2 әлеуметтік нысан газсыз отыр. Ал секундына 43 метр жылдамдықпен соққан желден ауыл тұрғыны ауруханаға түсті. Оның үстіне ескі сарайдың қабырғасы құлаған. Қазір ауданда қалпына келтіру жұмыстары жүріп жатыр.

Данияр Әлімқұл