Ақмола облысында бір жарым айда жол апатынан 15 адам қаза тапқан

Ақмола облысында бір жарым айда жол апатынан 15 адам қаза тауып, жүзден астам тұрғын жарақат алған. Полицейлердің мәліметінше, бұл бірінші кезекте жүргізушілердің жылдамдықты асырып, жол ережесін сақтамауынан болып отыр. Оған қоса, темір тұлпарды тізгіндегендердің жолда ұйықтап қалып, қарсы жолаққа шығып кетуі сияқты жағдайлар да жиілеп кеткен. Жалпы, бір жарым айда облыста 53 жол-көлік оқиғасы тіркелді.

Аслан Қызбикенов, облыстық полиция департаментінің басқарма бастығы:

Өткен жылы біз мас күйінде көлік жүргізген 748 адамды құрықтасақ, биыл 848 жүргізушіні ұстадық. Қазіргі уақытта жол апатын алдын-алу шараларын жүргізіп жатырмыз. Жол-көлік оқиғасы жиі болатын 75 жол учаскесін анықтадық. Ол жерлерге шу жолақтарын қойып жатырмыз.