Жаңалықтарды Telegram арнамыздан оқыңыз!Сенсациялық жеңіс! Футболдан 2024 жылғы Еуропа чемпионатының іріктеу кезеңінде Қазақстан өз алаңында Дания құрамасын қабылдады. «Н» тобындағы кезекті ойында алаң иелері басым түсті. Есеп: 3-2. Қазақстан мен Дания арасындағы бұл ойында ұлттық құрама жеңісіне күмәнмен қарағандар көп болды. Өйткені, FIFA-ның бүкіл әлемдік рейтингінде Дания 18, Қазақстан 115-нші орында тұр. Ойынның алғашқы таймын даниялықтар сенімді бастады. Кездесудің 21,36 минутына 11 нөмірдегі Расмус Хёйлунн алғашқы голын салды. Бірінші тайм 0:2 есебімен аяқталды.
Магомед Адиев, Қазақстан ұлттық құрамасының бас бапкері:
Өткен ойында өз алаңымыздағы жеңіліс құрамаға біршама әсер етті. Шегінерге жол жоқ. Бұл жайында ойыншылармен әңгімелестік. Даниямен кездесуде бірінші кезең біз ойлағандай болған жоқ. Екі гол қателіктер салдарынан соғылды. Екінші кезеңде ойыншылардың бір-бірін түсінуі оңайға соқты. Оны оңтайлы пайдалана алдық.
Екінші кезеңде ұлттық құраманың жігіттері белсенді бола бастады. Қарсыластар қақпасы маңында жиі бой көрсетті. Ойынның 73 минутында даниялық футболшылар өзінің айып алаңында ереже бұзды. Қақпаға белгіленген пенальтиден Бактиёр Зайнутдинов мүлт кеткен жоқ. Есепті бір голға азайтты. Ал, 86 минутта Асхат Тағыбергеннің алыстан шірене тепкен добы қақпаға дөп түсті. Бұл гол қарсылас командамен таразы басын теңестіріп, жанкүйерлерді де, футболшыларды да жігерлендіре түсті. Айта кететін жәйт, бұл қазірге дейін 43 ойын өткізген Асхат Тағыбергеннің алғашқы голы болатын
Асхат Тағыберген, Қазақстан ұлттық құрамасының капитаны:
Қазақ еліне, жанкүйерлерге көп рақмет! Ыстық қолдау болды. Қазақ елі, жеңіс құтты болсын!
Ойын аяқталуға 1 минут қалғанда Абат Айымбетов әуелеп келген допты баспен қақпаға енгізді. Есеп 3:2. Төрешілер негізгі уақыт аяталғаннан кейін қосымша төрт минут қосып берді. Бұл уақыт ішінде Абат Айымбетовке ескерту жасалып, артыншы қызыл қағаз алып, алаңнан қуылды. Екі команда бұған дейін төрт мәрте кездескен. Оның барлығында даниялық футболшылар жеңіске жеткен болатын. Бұл жолы қазақстандық құрама сол кеткен есені қайтарды. Бәлкім, бұл стадионға жиналған 30 мыңға жуық жанкүйердің демеуі болар. Енді Қазақстан алдағы ойынын 16 маусымда сырт алаңда Сан-Мариноға қарсы өткізеді. Ал, Даниямен қарымта кездесу 10 қыркүйекке жоспарланған. Сондай-ақ кеше «Н» тобында Словения - Сан-Марино, Солтүстік Ирландия - Финляндия құрамалары кездесті.
Асылбек Данияр
