Шыңжаң жұрты карантинге қарсылық білдіріп шеруге шықты

Қытайдың Шыңжаң Ұйғыр автономиялық аймағының халқы ауқымды шеруге шығып, карантиндік шектеулерге наразылық білдірді.

Өңірдің астанасы Үрімші жұрты «Локдаун доғарылсын!» деп ұрандатқан. Олардың айтуынша, осы қатаң шектеулер болмағанда көпқабатты үйдегі өрттен тұрғындар аман қалар еді. Айта кетсек, сол оқиғадан 10 адам қаза тауып, тоғызы жараланды.

Жергілікті билік карантин ережелері адамдардың лапылдаған жалыннан қашуына кедергі жасағанын жоққа шығарып отыр. Қытайда үш күннен бері коронавирус жұқтыру оқиғалары рекорд жаңартып келеді. Жұма күні бұл инфекция 35 мыңнан астам адамнан табылған. Ал локдаундарға қарсы акциялар осыған дейін Чжэнчжоудан бастап Гуанчжоуға дейінгі аралықтағы қалаларда да өткен.

Арыстан Рысбек