Алматыда белгілі суретші Кәміл Муллашевтің жеке көрмесі ашылды

«Уақыт үні». Алматыда осындай атаумен Қазақстанның еңбек сіңірген қайраткері, белгілі суретші Кәміл Муллашевтің жеке көрмесі ашылды. Келушілерге өнер иесінің соңғы 5 жылдағы шығармалары ұсынылды. Картиналар адам өмірінің құндылықтары, руханият туралы сыр шертеді. Туындылар қазіргі заманның түйткілдерін сипаттайды. Суретші жұмыстарының бүгінгі дейін сақталған маңызды тұстарының бірі – уақытты сезіну және түсіну қабілеті. Сол себепті де, Кәміл Муллашев көрмесін осылай атап отыр. Айта кетейік, автордың еңбектері Ресейде де қойылып, әлемнің түрлі елінде 26 жеке шығармашылық кешін ұйымдастырған. Ал көрме қазанның 7-не дейін жалғасады.

Кәміл Муллашев, суретші:

Мен 80-ге келіп қалдым, сондай болса да, күнде 10 сағаттай жұмыс істеймін. Неге десеңіз, ішім толқындап, жүрек толқынданып, іште ой-сезім болғаннан кейін, қартайсаң да, белің ауырса да, қолыңды көтеретін күш табасың.

Байтұрсын Өмірбеков, өнертанушы:

Осы шығармаларға қарап отырып, бұл жерде жасы ұлғайған адам емес, жас адамның шығармалары ма деп қаласың. Сондай ізденістері мол, түрлі түс интенсивті, экспрессивті дүниелер бүгін мына залда тұр. Кәміл осы жұмыстарымен біздің Қазақстанның бейнелеу өнеріне үлкен үлес қосып отыр.

Фариза Мұсақызы