Флоридадан айға кореялық аппарат ұшырылды

Оңтүстік Корея Айға орбиталық аппарат ұшырды. Ол АҚШ-тың Флорида штатындағы Канаверал мүйісінен көкке самғады. «Данури»  атты зондты ғарышқа Илон Масктің «SpaceX» компаниясының «Falcon-9»  зымыраны жеткізуі керек.

Айта кетсек, Оңтүстік Корея бүгінде өзінің ғарыштық бағдарламасын екі есе күшейтіп, 2030 жылға дейін Айға зонд қондырудан үмітті. Бұл мақсаты орындалса, Оңтүстік Корея Азияда Айды зерттеуге кіріскен Қытай, Жапония, Үндістаннан кейінгі төртінші елге айналады.

«Данури» желтоқсанда Айдың орбитасына шығып, бір жылдық миссиясы кезінде, қону алаңын іздеп, ғарыштық интернет технологиясын сынау тәрізді қызметтерді атқарады.

Арыстан Рысбек