Басты Жаңалықтар Ұлттық өнердің өрісі кең

Ұлттық өнердің өрісі кең

27.03.2014 12:30

Семейлік Сейілбек Асхан жастар арасында ұмыт болып бара жатқан ұлттық өнер - кесте тоқуды насихаттап жүр. 10 жыл бұрын Моңғолиядан оралған қандасымыз төл мәдениетімізді жаңғырту мақсатында БҰҰ «Даму» бағдарламасынан арнайы грант жеңіп алған. Қазір сол қаражатқа қолөнерді тегін үйрететін үйірме ашып, жұмыс істеп келеді.

Моңғолиядан көшіп келген Сейілбек Асхан қазір Семейге қарасты Мұқыр ауылында тұрады. Тарихи Отанынан жырақта өскен шебер қазақтың қөлөнерін жетік меңгерген. Құрақ құрау, киіз басу, кілем тоқудың бүге-шігесіне дейін білетін қолөнерші енді оның барлығын жастарға үйретіп жатыр.

Сейілбек Асхан, шебер:

Көрген адамдар қатты таңырқайды. Барлығы үйренгісі келеді. Шәкірттер көп. Мектепте балаларға тегін үйретемін.

Қазір ұмыт болып бара жатқан өнердің ең күрделі түрі - кестелеуді шебер шәкірттеріне үйретуде. Оқушылардан бөлек, біз ұстап, кесте өруге қызығушылық танытатындар көп. Тіпті, қала мектептеріндегі технология пәнінің мұғалімдері де арнайы келіп, шеберден сабақ алып тұрады.

Ақнұр Қанғожа, 11 сынып оқушысы:

Қазақ - оюды жақсы көретін халық. Сол себепті жас қыздар, көптеген адамдар осы Сейілбек апайдан үйренеміз. Жалпы, бұл өнерді меңгеруіміз қажет.

Оралхан Байзулинова, мектеп директорының тәрбие ісі жөніндегі орынбасары:

Бүгінгі таңда балалар көп нәрсе үйренді. Асхан Сейілбекпен күнделікті кездесіп тұрады.

Шебер - түрлі беделді көрмелердің жеңімпазы. Оның қазақтың иісі аңқып тұратын, ұлттық нақыштағы туындыларын жәдігер етіп қою үшін сұрататын мұражайлар да көп.

Әсіресе, Наурыз мейрамы қарсаңында қолөнершіні іздейтіндер көбейеді. Ал, Асхан Сейлхан ұлттық оюмен безендірілген мұндай дүниелер тек мұражай мен көрмелерде емес, әр қазақ отбасының төрінен күнделікті табылса, деп армандайды.

Ержан ЖАҚЫП

Автор

Ержан Жақып

Бөлісу