Басты Жаңалықтар Керекудің кербез сұлу Майрасы

Керекудің кербез сұлу Майрасы

20.03.2014 09:30

Наурыз мерекесіне орай Павлодарда «Керекудің кербез сұлу Майрасы» атты байқау өтті. Атақ-даңқы алты Алашқа тараған халқымыздың ардақты тұлғасының бірі Майраның небәры 13 жасында Керекудің әнші-гармоншы қызы атанғаны белгілі. Ол қазақ ән өнерін дамытуға баға жетпес үлес қосты.

Әнші, гармоншы, кербез, сұлу, сәнқой, шаруақор. Бұл атаулардың барлығы бір Майраның бойынан табылған. Ол Әміре Қашаубаев, Қажымұқан Мұнайтпасұлы, Иса Байзақовтармен замандас болды. Тек ән ғана емес, өткір сөз, уытты қалжың, тапқыр сөздерімен аты шықты. Тіпті, заты әйел бола тұра сал-серілік дәстүрді ұстанған.

Талжібек Атамбек, Ж. Аймауытов атындағы Қазақ музыкалық драма театрының әртісі:

Ата дәстүрден аттап кете алмай өмірі еркіндікті аңсап өткен Майраның бір қырын көрсеткіміз келіп тұр бүгін.

Мазмұны терең, тілі өткір. Ұлттық музыка қазынасында сирек кездесетін «контральто» қоңыр даусымен салған Майраның бұл әні бүкіл қазақ жеріне тарады. Ол 37 жасында қайтыс болды. Қысқа ғана ғұмырындағы бейнесі ұрпаққа үлгі болып қалды.

Әсел Ботайева, И.Байзақов атындағы Ұлттық филармонияның әншісі:

Майра Шамсутдинованың бейнесі арқылы ғасырдан келе жатқан біздің салт-дәстүрімізді сабақтай отырып бүгінгі қыз-келіншектердің бейнесін, нағыз қазақ қыздарының бейнесін көрсету үшін конкурсқа қатыстым.

Наурыз - құт-береке басы. Шығармашылығымен қатар әйел затына тән жан сұлулығы, сырлы сезім, асқақ талғамы бар Майрадай қыз өсіріп, келін тәрбиелеу ақ жаулықты аналарға аманат.

Болат АМАНБАЕВ

Автор

Болат Аманбаев

Бөлісу