«Қазгидромет»: Үш өңірде 35 градусқа дейін аяз болады

Желтоқсанның соңғы күндері атмосфералық ағындардың өтуіне байланысты еліміздің батысында, шығысында және орталығында күн құбылмалы болады. «Қазгидромет» орталығының мамандары еліміздің бұл аймақтарында қар жауып, 35 градусқа дейін аяз болатынын хабарлады.

Ал еліміздің қалған аумағында күн жауын-шашынсыз болады. Республика бойынша кей жерлерде тұман түседі.

Атырау облысының солтүстігінде, орталығында жаяу бұрқасын соғып, тұман түседі, көктайғақ болады. Шығыс Қазақстан облысының солтүстігінде, шығысында жаяу бұрқасын соғып желдің жылдамдығы секундына 15-20 метрге жетеді.

Күн райының күрт суып, қатты аяз болуына байланысты бүгін елордадағы 1-ауысымдағы колледждердің 1-2 курс студенттері сабақты қашықтан оқиды.