Өскемендегі кәсіпорында екі жұмысшы қаза болды

Өскеменде титан құймалар мен плиталар шығаратын зауытта екі жұмысшы қаза тапты. Олар электронды сәулелі пеште жөндеу жұмыстарын жүргізіп жатқан. Қалалық полиция басқармасы іс қозғап, тергеп-тексеру амалдарын бастады. Ер азаматтар небары 28 және 20 жаста болған. Бірінің артында жүкті әйелі мен кішкентай баласы қалды. Жалпы биыл облыста өндіріс орнындарында 164 жазатайым оқиға тіркелген. Бұл қайғылы оқиғаны облыстық еңбек инспекциясы да тергеп жатыр.

Бақытбек Қизатов,  облыстық мемлекеттік еңбек инспекциясы басқармасының басшысы:

Осы бойынша біздің қызметкерлер және прокуратура бірлесіп оқиға болған жерді қарады. Қазіргі кезде біз арнайы комиссия құрдық. Олар оқиғаның себебін, салдарын оның мән-жайын анықтап,  өзінің шешімін береді.