Көкшетауда жер үйдің төбесі опырылып, бір адам көз жұмды

Көкшетауда жер үйдің төбесі опырылып кетіп, бір адам көз жұмды. Оқыс оқиға түнгі сағат он екілер шамасында Баубек Бұлқышев көшесіндегі екі пәтерлі үйде болған. Баспананың бір бөлмесінің шатыры опырылған сәтте 63 жастағы әйел үйінді астында қалып қойған. Құтқарушылар жеткенше зейнеткер қайтыс болды. Көз жұмған әйелдің ұлымен және екі немересімен тұрғаны белгілі болды. Апат болған кезде үйде 13 және 14 жасар қос жеткіншек болған. Көмек шақыртқан да солар. Үй иесінің айтуынша, баспана осыдан 70 жылдай бұрын салынған. Бұған дейін үйдің апатты деп танылмағаны белгілі болды.

Александр Метров, қала тұрғыны:

Мен іс-сапарда болдым. Түнгі үште жеттім. Балалар шошып кеткен. Олар не істей алады?! Егер бірден көмек көрсетіп, алып шыққанда, аман қалар ма еді? Төбедегі бөренелер шіріп кеткен ғой. Мына жерде барлығы ескі үйлер. Баспаналарды бұзып, мына жерге жаңа көпқабатты үй саламыз дегендер болды. Алайда, нақты қадамдар, ұсыныстар болған жоқ.

Ермек Елберген