Қызылорда облысында заңсыз аңшылықпен айналысқандар ұсталды

Қызылорда облысында 22 қасқалдақ пен 68 үйректі атып алған үш адам қолға түсті. Охотзоопром-ның өңірлік филиалы мен аудандық полицейлер жүргізген рейд кезінде осындай заңбұзушылық анықталды. Мәліметтерге сай Қаратерең ауылы маңында «Нива» көлігі тоқтатылған. Тексеру кезінде ішінен 3 аңшы мылтығы, 22 қасқалдақ, 68 үйрек табылды. Қазір барлық айғақ зат тәркіленіп, 46, 52, 55 жастағы 3 азамат ұсталды. Әрі заңсыз аңшылық бабы бойынша сотқа дейінгі тергеу жүріп жатыр.